" عريس فريلانسر "
- السبت ٢١ / مايو / ٢٠١٦

بقلم : ندى محمد
هو فارس الاحلام لازم يكون موظف ؟ قصدي يعني لو اتقدملك فريلانسر هتقبليه؟ عمرك فكرت قبل كدا تتخلي عن حلم الوظيفة وتشتغل شغل حر؟ الوظيفه -ده لو اتوفرت - ممكن تحقق الاستقرار لكن مفهاش اي فرص للتطور لا المادي و لا المعنوي . كبيرها علاوه شويه جنيهات كل سنه يدوب يشتروا اتنين كانز ،، لكن العمل الحر ممكن يكون بدايته صعبه و مفهاش برستيج لكن لو كملت صح اكيد هتوصل ! هو انت متعرفش ان الاحصائيات الرسميه بتقول ان دخل العامل الحر بيزيد عن الموظف الحكومي ب 45% .. علشان كده معظم فرسان الاحلام اشتغلوا فريلانسرز . دلوقتي اتجه شباب كتير لثقافة الفريلانس اي العمل الحر، وبدأ كل واحد يشوف هو بيحب ايه ويتخذه مهنة، مثلا اللي بيحب يصور اشتري كاميرا وبقي مصور، اللي بتحب الاكسسوار عملت مشروع هاند ميد،اللي بيحب يرسم عمل اتيليه رسم علي الملابس والأحذية ونقش الحنه ورسم البورتريهات، اللي بتحب المكياج بقيت ميكاب ارتسيت وهكذا. لازم تكون مقتنع ان الفريلانس بيحقق مميزات كبيره بخلاف فرص زياده الدخل ،، منها حرية القرار و عدم التقيد بروتين الوظيفه ومواعيد العمل الرسمية و لوايح عفي عليها الزمن و اوامر من مديرين. وبكدا بدأت الوظيفة الحكومية النمطية تفقد بريقها المعهود،بس السؤال هنا؛ هل المجتمع هيقبل بالاعمال الحره كمهنة دائمة؟ هل الاهالي هيوافقوا يجوزوا بناتهم لواحد ماعندهوش دخل ثابت او وظيفة روتينية؟هل هنقدر نضحي بالدخل المستقر في مقابل الدخل المفتوح؟